محمد فارس: القصة أعمق من كلمة ” حمدالله على السلامه” بالنسبة للشناوى
محمد فارس: القصة أعمق من كلمة ” حمدالله على السلامه” بالنسبة للشناوى
أكد الإعلامى محمد فارس أن محمد الشناوى من القلائل الذين يدلون بتصريحات صحفية، لذلك عندما صرح بأنه لم يقل أحد له حمدالله على السلامه كان له قصد أخر.
وكتب فارس” الشناوي من اللاعبين القليلين اللي حقيقي جدا في تصريحاته وشخصية واضحة مش fake، رسالة الشناوي للصحافة المصرية ومدرسة الفبركة والأخبار اللي هدفها الترند والاخبار اللي ضد مصلحة الأندية حتى من بعض المنتمين للأندية نفسها . دي ظاهرة ناس كتير أوي خايفة تتكلم فيها او تقرب منها لأنها شبكة مصالح بتخدم كلها على بعضها وقصة طويلة أوي والحقائق فيها صادمة ومرعبة
وامبارح كلام الشناوي عن أن محدش قال له حمدلله على السلامة، القصة عند الشناوي أعمق بكتير من فكرة حمدلله على السلامة القصة ان مستحيل تكون دي الأخبار اللي الإعلام والصحافة والسوشيال ميديا بتتعامل بيها مع حارس هو المصنف رقم ١ في مصر وهو الحارس الوحيد في تاريخ مصر اللي أخد أحسن لاعب في أفريقيا وحقق أفضل لاعب في مباراة في كأس العالم
عايز تعرف أحنا واصلين للقاع ازاي الصدفة الغريبة هتفهمك ده . كورتوا اتصاب في الريال والحارس الشاب اندري لونين أخد الفرصة للمشاركة وشال الريال وقدم أداء أسطوري وفضل يشارك لحد ما قاد الريال للوصول للنهائي بعد ما تخطى بايرن ميونخ . رجع كورتوا من الإصابة انشيلوتي قرر يشركه في الليجا قدام ريال بيتيس على حساب لونين ثم قرر ان كورتوا هو اللي يشارك في النهائي قدام دورتموند
رد فعل الصحافة والإعلام والجمهور كان مقدر جداً مجهود لونين ودوره مع الريال في التتويج بالليجا ودوري الأبطال بس الأهم انهم كانوا عارفين كمان قيمة كورتوا وتاريخه وتصنيفه كحارس له قدره وقيمته
وعشان كده انا كنت من أكير الداعمين لشوبير ومازلت لان المستقبل بتاعه هو ولكن في كل لحظة كنت حريص افكر الناس بقيمة الشناوي . وهنا يجي السؤال هل تم التعامل مع الشناوي كقيمة ثابتة بتحفظ له اللي قدمه للأهلي وتحفظ له كونه كابتن الفريق واللي ضحى بعروض خيالية عشان النادي الأهلي والحارس الأول في مصر . أنا بقولك الإجابة لا
حمدلله على سلامتك يا شناوي يا قائد وإن شاء الله لسه قدامك تاريخ كبير تحققه مع الأهلي برا وجوا الملعب.
