تحدث دينو لامبرتي وكيل مارسيل كولر المدير الفني للأهلي عن العديد من الأمور وأكد تجديد تعاقد السويسري مع الأهلي لثلاثة سنوات مقبلة.
وظهر لامبرتي عبر شاشة أون تايم سبورتس مع الإعلامي أحمد شوبير ليتحدث عن المواصفات المعينة التي يبحث عنها كولر في مهاجم الأهلي المنتظر.
وقال وكيل كولر: "في العالم، إن انت تلاقي مهاجم كويس، الموضوع مش سهل، في العالم مبقاش في مهاجمين كتير كويسين، خلي بالك كمان إن إحنا بندور مش بس على لاعب كورة، بندور على إنسان، لازم يقدر يندمج في الحياة، عقليته تسمح بالضغوط إللي هنا، فإحنا مش بندور بس مش على لعيب كورة، بندور على شخصية كمان وعقلية كمان تقدر".
وأضاف وكيل كولر: " أعتقد إن هو شاف فوق الـ50 لعيب فعلا وهو قرر على قائمة فيها 2-3 لكن للأسف ماديا الأهلي مقدرش يخلص فيهم لكن هو واثق إن شاء الله إنه هيلاقي حد".
وحول صفقة سوزا فأكد وكيل كولر: "معرفش كل حاجة ما بيقوليش كل حاجة، الواحد عارف إن من الناس اللي كان عايزها سوزا لكن معرفش كل حاجة".
وتابع لامبرتي: "النادي بتاعه مرضاش يسيبه، كان في اتفاق مع اللاعب ومع النادي، كل حاجة كانت خلصت، وبعدين اللي حصل إن النادي باع لاعب لإنجلترا، وفجأة رجعوا في كلامهم ومش عايزين يسيبو جوستافو الحاجة الوحيدة اللي أنا عارفها، لكن اللعيبة التانية اللي كانت في القائمة القصيرة معرفش مين".
