اتّهمت الفنانة الشابة ندى عفيفي النجمة لوسي بمجموعة من الاتهامات منها سبها وضربها خلال كواليس مسرحية "الحفيد" المقدّمة على خشبة المسرح القومي.

وسردت ندى عفيفي، في منشور عبر حسابها الشخصي بموقع التوصل الاجتماعي فيسبوك تفاصيل الأزمة كاملة: "هخرج عن صمتى وأتكلم وأنا مرفوعة الرأس ومش هتكسف أقول اللى حصل معايا فى عرض الحفيد".

أضافت: "أولا بأكد كل معلومة اتكلموا فيها زمايلي من انتهاكات حصلت فى حقنا وكان سببها الفنانة لوسي، بل بالعكس فى حجات كتير وتفاصيل كتير متقالتش.. وعايزه أقول احنا مكناش ساكتين ضعف أو تهاون فى حقوقنا أبدا بالعكس احنا كنا ساكتين احترامًا للتحقيقات اللى كانت بتحصل والقائمين عليا وحب فى سمعة عرض الحفيد والمسرح القومى، بالرغم من تصريحات الفنانة لوسي فى برنامج الأستاذة لميس الحديدى واللى كانت كلها افتراءات وتخلو تماما من أى شيء من الصحة".

وتابعت: الواقعة اللى تخصنى وهى أن الفنانة قامت بضربى وشتمى أمام الجمهور بالفعل مما أصابنى بالذهول وسابتنى على المسرح وخرجت وما كان مني إلا أنى احترمت المسرح القومى والجمهور الغالى وزمايلي وكملت شغلى، لكن فور خروجى من على المسرح أصابتنى نوبة انهيار ومع ذلك كملت العرض زى أى فنان محترم وبيحترم شغله والخشبة اللى واقف عليها.

واستكملت: دخلنا المشهد اللى بعده مسكتني وعنّفتني تاني أمام الجمهور، وأنا فى منتهى الذهول من العبث اللى بيحصل من فنانة كبيرة كان عندى أمل أننا نتعلم من خبرتها الفنية، وأن تحتضن هى مشاكلنا بدلا من افتعالها.

أضافت: "خلصت ليلة العرض وما كان من استاذ ايهاب فهمى مدير المسرح القومى كل التقدير لشخصه الا كل احتواء لنفسيتى وجبر خاطرى ووعدى بأنه قام باللازم مع الفنانة لوسي وأن حقى هييجي وانا مازلت حتى الآن أشكره لدعمنا واحترامه لفننا وبعدها توقف العرض وإلى باقى الأحداث اللى انتو تعرفوها".

واختتمت المنشور قائلة: من الجدير بالذكر أن المخرج يوسف المنصور وعدنى أن اللى حصل ده مش هيعدى وكان مساندني وقاللي أنه خلاص تم الاتفاق على أننا هنستبدل الفنانة لوسي بفنانة أخرى وإن ده الطبيعي مع تخطي فنان لحدوده بهذا الشكل وفعلا فضلنا منتظرين معاد أول بروفة مع الفنانة الأخرى إلا أننا فوجئنا جميعا بالشكوى اللي قدمتها الفنانة لوسي لمعالي وزيرة الثقافة دكتورة نيڤين الكيلاني رغم أننا كنا متخيلين أن الفنانة لوسي هتبقى سعيدة بقرار استبعادها، لأنها دايما كانت بتقول انها مش عاوزه تكمل معانا، لكن طبعا الشكوى اللي هي قدمتها وقفت العرض وحصل بعد كده اللي زمايلي نشروه.