حسم مجلس إدارة الاتحاد المصري لكرة القدم مرة أخرى أمر سبب عدم لعب الأهلي في الإسماعيلية بعد أن أصبح هذا الأمر هو حديث جزء كبير من الجماهير مع كل موسم، أو كل مباراة يكون طرفها الأهلي والإسماعيلي.
وشرح عامر حسين عضو مجلس إدارة اتحاد الكرة مسألة اختيار ملاعب المباريات قبل بداية الموسم، مؤكدًا أن ليس للاتحاد أو الأندية دخل في هذا الأمر.
وقال عامر حسين في مداخلة هاتفية ببرنامج "ديربي مع أحمد أسامة" عبر إذاعة القاهرة الكبرى 102.2 FM: "قبل الموسم كل نادي بيجيب موافقة صاحب الملعب والأمن والنادي بيبعتلي ملعبه والملعب البديل أنا ببعت الملاعب للأمن العام اللي بدوره بيبعتها لمديرية الأمن في المحافظات المختلفة وبعدين بتشكل لجنة من جميع الهيئات وياخدوا قرار نهائي".
وأضاف: "تقوم مديرية الأمن بإرسال قرارها للأمن العام وبعدين يبعتلي يقولي الملعب ده ينفع أو لا والملعب ده متلعبش فيه مباريات جماهيرية هما بيحددوا مباريات معينة أن دي متتلعبش في الملعب ده وتتنقل ملعب معين".
وأكمل: "دايما كان بيتم السخرية مني والحاج عامر والدواعي الأمنية أنا قعدت مرتين برة الاتحاد في الفترة اللي فاتت وجه اتنين مكاني وبرضوا نفس الوضع ونفس الملاعب اشتغلوا عليها".
وأتم عامر حسين حديثه: "لأول مرة أنا مقدم تصور هيبقى موجود في الشروط واللائحة اللي هتطلع مع الجدول هيبقى متحدد الأيام هتبقى واضحة من أول الموسم أننا مش بنأجل بمزاجنا المشكلة أن ممكن الاتحاد الأفريقي ميحددش المواعيد من الأول، ولكن سنحاول حل هذا الأمر".
